直搗黃龍

終於行埋大澗中嘅大大澗黃龍石澗…
好感動…總算制霸新九大石澗…(嚴格嚟講仲爭梧桐)

由11點半行到8點半…
行完足足過多三日先完全回復…
可知五星黃龍絕非虛言…

剩係下游都已經無敵開揚…
加上水質清澈透底…
正到連赤鱲角村村民都當下游下私人泳池…

唔駛行好耐…就去到黃龍主瀑…
嘩…完全係我嘅Dream Stream…
雖然已經入秋…落水凍到打冷震…
但係面對如此美景真係忍唔住唔落水融入其中…

一路行…經左右雙龍…
兩面絕崖聳立…
壯麗到令我唔記得自己身處香港…
然後前路變得崎嶇…
遊過黃龍三險:藤梯崖、懸崖棧道同蛇倒退…

藤梯崖經已名存實存…剩返一條繩…
攀上去只能完全依靠臂力…
中間亦有極多樹枝同蜘蛛擋路…
一鬆手就可以直抵地獄…
我亦唔夠膽挑機…

懸崖棧道非常正…
難得嚟又幾易…
危險得嚟又帶點安全…(廢話連篇)
過咗之後非常有滿足感…

最後係蛇倒退…
一面斜壁…
雖然有人set好繩但係其實唔用繩都可以輕鬆解決…
對呢一險有啲失望…

廢堅去到第二險已經分道揚鑣唔知去咗邊…
過哂三險後就係無限向上嘅亂石山谷…
一直同男哥攀上去…
上到最頂發現只剩底山泥傾瀉嘅泥坡…
搵唔到路繼續…
嘗試攀上泥坡亦成功上到…
不過發現都係冇路落坡時付出慘痛代價…
仆低幾次搞到損手爛腳…

搞一大輪決定靠人聲搵路…
不時聽到有人聲但係搵唔到啲人…
大叫都冇用…冇人應…
最後只能夠治路落澗…
落到某個位見到廢堅…
同一大班大叔行緊…

佢地話行林路行行下變咗剷林…
所以就落返石澗…
我地說明咗喺石澗盡頭嘅環境後…
大家都決定照上…

佢地成班又中醫師又GPS咁…
真係過份…
我同男哥再次上路…
攰到瞓係度…

上到去竟然又俾個大叔搵到路…
原來我地之前偏離原來嘅石澗先搵唔到絲帶…
繼續行就係斜道都有返咁上下嘅林路…
感覺係半剷林半攀石…

幾經辛苦終於走出樹林上到山頂位…
正好欣賞到東涌日落…
超靚…都唔知有幾耐冇見過咁鹹嘅鹹蛋黃…
不過惡夢永遠會出現係美夢之後…
出到鳳徑大路係就係好行…
不過有排行…
去到大東山已天黑…

由黃龍郊遊徑落…
條路又黑又長…
行到腳都震哂…
喺缺水缺糧嘅情況下仲要面對極噁心嘅螢火蟲…(即使好難得有得睇螢火蟲)
大家都痛不欲生…我都要拎頭燈出嚟用…

男哥後來更化身死屍…
失去90%移動能力…
危急之下要靠背囊中嘅麥記泰式辣醬同茄汁保充能量…
而家諗返真係笑死我…
叫咗你平時唔好又煙又酒架啦…抵死!

我們以行十分鐘抖五分鐘嘅龜速移動方式…
終於喺八點半返回石屎馬路…
成個人鬆哂…!

回到文明嘅地方見到第一間開喺圍村入面嘅茶餐廳即刻仆入去…
食佢一個片甲不留…男哥都食到小強撈飯…正!

經過今次之後…
相信可醫好男哥嘅失眠…
同埋我覺得黃龍真係可以再去…
係一條可以挑戰自己體能極限嘅爆靚大澗…
如果黑色暴雨去更好…變成黑龍石澗…
喺以以卵擊石方式自殺嘅首選…

Leave a Reply